Новый Акафист...

Радуйся, волны скорбей и обстояний потребляющая,

Радуйся, здравие душам и телесем подающая.

Радуйся, бури и ветры духовнии удаляющая,

Радуйся, облаки уныния далече отгоняющая.

Радуйся, любы Христовы непрестанно нам являющая,

Радуйся, спасение вечное устрояющая.

Радуйся Преблагословенная Богородице, Милосердная наша заступнице.

Кондак 4.

Бурю житейских попечений далече отринувше, с велиим прилежанием внимала и хранила в Своем Пречистем сердце глубины Божественного Писания. Сего ради непостижимей милости сподоби Тя Господь, взирающий токмо на кроткого, молчаливого и трепещущаго Словес Его. Емуже и мы вопием: Аллилуиа.

Икос 4.

Слышаще страшнии Словеса Господни и трепеща судеб Божиих, даже и Ты, Пречистая, молила Бога во Успении Своем не видети безобразных князей тьмы века сего. О Владычице, заступи и нас Твоими Матерними мольбами, егда разлучатися будем от телеси, да во всесветлем веце будущем всерадостно воспоем Ти: 

Радуйся, любы к Писанию нам прививающая,

Радуйся, судьбы и заповеди Божии соблюдати наказующая.

Радуйся, тьму душевную Светом Христовым озаряющая,

Радуйся, в час брани и испытаний нас не оставляющая.

Радуйся, по Правде Божией на земли пожившая,

Радуйся, Закон Владыки в сердце Своем вместившая.

Радуйся, Сущаго Бога яко никтоже познавшая,

Радуйся, глубину судеб Промысла паче всех исследившая.

Радуйся Преблагословенная Богородице, Милосердная наша заступнице.

Кондак 5.

Боготечная изобилующая благодать подается от Господа чрез святую икону Твою Богородице, яко воскресают людие пред сим образом, благодарно поющих Богови: Аллилуиа.

Икос 5.

Виде благочестивый муж некий великую силу Божию, чрез икону Юровичскую совершаемую, принесе к нему умершего сына. Слезно же моляся Ти Милосердной, воста из мертвых отрок, из глубины души взывающий:

Радуйся, источник безсмертия нам воплотившая,

Радуйся, реку вечного живота излившая.

Радуйся, яко кита всеядца смерть поправшая,

Радуйся, ликование о Бозе нам подавшая.

Радуйся, в книзе Агнца Божия нам быти Ходатаице,

Радуйся, вселение мнозих на Небе Виновнице.

Радуйся, от плотских помыслов к Животу о Христе благая Наставнице,

Радуйся, на Страшнем Судище Великая Заступнице.

Радуйся Преблагословенная Богородице, Милосердная наша заступнице.

Кондак 6.

Проповедуеши и до ныне о милосердии Божием чрез чудотворный образ Твой Дево Мати. Людие далече стоящии от Святыя Церкви,  обретают живую пламенную веру и в надежде благ вечных взывают Богу: Аллилуиа.

Икос 6.

Возсия Свет Истины для маловерного мужа Николая, недугом одержимому и сего ради не могущему трудами рук своих напитати своих домочадцев. Егда токмо возре на образ Твой и тепле помолися Ти Мати Пречистая, тотчас исцеле, укрепися же в вере и в велией благодарности сердца взываше Ти:

Радуйся, веру Христову в тесноте сущим дарующая,

Радуйся, огнь благодати в хладном сердце возжизающая.

Радуйся, из нездравия во здравие души претворяющая,

Радуйся, очи мысленныя весьма просвещающая.

Радуйся, озноб нерадения далече прогоняющая,

Радуйся, ревность по Бозе в дусе нашем возставляющая.

Радуйся, слезы радостотворнии сокрушенным сердцем подающая,

Радуйся, в бедах и скорбех вскоре избавляющая.

Радуйся Преблагословенная Богородице, Милосердная наша заступнице.

Кондак 7.

Хотяще последней рабой грядущему Месии послужити, явилася Богородительницей Дево Марие. Простыми матерними заботами и велией любовию Господу благоугодила еси, приемлет бо труд кротких и смиренных сердцем Небесный Владыка, из глубины воспевающих Ему: Аллилуиа.

Икос 7.

Обновляются от Господа сердца верных, с теплою мольбою припадающим к чудотворному образу Твоему Мати. Суетные попечения и сребролюбия прельщение яко терния и волчцы благодатию попаляются, да суботствующею душею не престанут людие Божии пети Ти Владычице сицевая:

Радуйся, смиренными трудами Богу угодившая,

Радуйся, Творцу Неба и земли яко Мати послужившая.

Радуйся, образ послушания всем родом явившая,

Радуйся, Богу Промыслителю и Попечителю Себе уневестившая.

Радуйся, токмо Владыце Вселенней Себе поработившая,

Радуйся, благое иго Христово трудолюбно понесшая.

Радуйся, иго тлеющаго мира сего мужественне отвергшая,

Радуйся, падшего человека Господу благоугождати возставившая.

Радуйся Преблагословенная Богородице, Милосердная наша заступнице.

Кондак 8.

Странное Рождество Христово явлено бысть, яко не обреташеся храмины для Сущего Вседержителя, токмо убогий вертеп. Удивляются сему человеколюбивому Божию смирению вси роди, воспевая Богови: Аллиллуиа.

Икос 8.

Во всем Господеви последуя Богомати, иногда в житии Своем не обретала места идеже главу приклонити. Ныне в Вышних пребывающи селениях, помогаеши ищущим крова и приюта сирым и убогим человекам, чрез Святую икону молящих Тя о сем. Да вси тихо и безмолвно поживут во своих домех, приносяще Ти сице:

Радуйся, в сердцах наших Храм Божий устрояющая,

Радуйся, добродетелями его украшающая.

Радуйся, даже и земный доме устрояти помогающая,

Радуйся, двери райстии Богу угодившим отверзающая.

Радуйся, к небесным жилищам умы наша возводящая,

Радуйся, верных сердца духовно веселящая.

Радуйся, обители на Небе Богу служащим уготовляющая,

Радуйся, под кровом Своим нас покрывающая.

Радуйся Преблагословенная Богородице, Милосердная наша заступнице.

Кондак 9.

Всякое естество ангельское удивися неизреченней высоте смиренномудрия Твоего, Мати. Мы же образом жития Твоего научаеми смирятися под крепкую десницу Владычню, яко да вознесет нас в свое время, поющих Ему: Аллилуиа.

Икос 9.

Ветия многовещанныя, яко рыбы безгласныя видим безкрайнее милосердие Твое Богородительнице, рождшая Милость и Истину. Нищим, убогим, смиренным рабам Господним великое Христово утешение даруеши, в житейских нуждах и скорбех помогаеши, да престанут от слез и в веселии сердца воспоют Тебе сице:

Радуйся, всех ангелов смирением превысшая,

Радуйся, всех человеков достойнейшая.

Радуйся, Храме святый смиренного Владыки Христа,

Радуйся, Тобою бо гордый паде и человек смиренный воста.

Радуйся, последней рабой послужити Мессии желавшая,

Радуйся, Материю Бога быти не чаявшая.

Радуйся, сердца наша на Небо возводящая,

Радуйся, сокрушенных духом николиже презирающая.

Радуйся Преблагословенная Богородице, Милосердная наша заступнице.

Кондак 10.

Спасти хотя мир, иже всех укрраситель Христос, благоволи пожити в чистейшем и кротком сердце Твоем, Владычице. Ныне же помози и нам подражати Твоим добродетелям и вкупе с Тобою песнь хвалебную приносити Богови: Аллилуиа.

Икос 10.

Стена ограждения от суетного и многомятежного житейского моря явилася еси Владычице, яко чудная тайна безмолвия будущаго века открыта бысть Тебе, ради тихости нрава души Твоея, Пречестная. Сего ради подаеши успокоение от чудоточныя иконы, иже именуется Милосердная. Исходатуй же, Мати, и нам наслаждатися тишиною во Царствии Небеснем, и пети Ти в безконечнии веки сице:

Радуйся, райскую тишину в душе Твоей вместившая,

Радуйся, тихостию Богу угодившая.

Радуйся, образ безмолвия всем подавшая,

Радуйся, кротостию Твоею Творца прославившая.

Радуйся Мати, всех храмов благолепнее и благодатнейшая,

Радуйся, утешение в лицезрении образа нам подавшая.

Радуйся, от бурь и мятежей многих нас спасавшая,

Радуйся, к тихому пристанищу Духа Святаго путеводьшая.

Радуйся Преблагословенная Богородице, Милосердная наша заступнице.

Кондак 11.

Пение всеумиленное приносим Ти, Всемилосердная, яко аще отец и мати оставят нас, Ты же, Владычице, непременно восприимеши и сохраниши ны от всяких напастей и бед. Но яко имущая великую и неизреченную благость, благодарим Бога, даровавшего Тя в заступление нам, поя Ему: Аллилуиа.

Икос 11.

Светоприемною свещею любви Своея согреваеши души наша, егда хлад скорбей и обстояний окружают нас. Простри же и ныне всеблагостную и пречистую руку Твою в помощь нашу, да воззовем Ти:

Радуйся, своею благостию души падшия возставляющая.

Радуйся, греси верных исправления ради покрывающая,

Радуйся, на Суде Божием нас оправдающая.

Радуйся, бремена и тяготы житейстии разрешающая,

Радуйся, духом кротости и смирения нас веселящая.

Радуйся, наказания Господни милостию смягчающая,

Радуйся, в Царствие Небесное провождающая.

Радуйся Преблагословенная Богородице, Милосердная наша заступнице.

Кондак 12.

Благодатнии шестокрилатии Серафими токмо клещами прикасаются к Божественному Углю с горняго престола, якоже узре пророк Исаия. Ты же, Владычице, вместила в Пречистую утробу Угль Божества Христа, Емуже со Отцем и Святым Духом поем: Аллилуиа.

Икос 12.

Поюще Ти сицевая, уповаем на Твое предстательство Дево Марие, до ревности бо любит людей Своих Господь, наказует же всякого человека, егоже приемлет. Не престай же Милосердная Богородице укрепляти и помогати нам в час испытания и наказания Божия, да очистившеюся душею воспоем Ти:

Радуйся, Духом любви Отчей Слово заченшая,

Радуйся, Христа Искупителя во утробе Своей вмещшая.

Радуйся, волю Свою воли Господней подчинившая,

Радуйся, вся заповеди Божии добре исполнившая.

Радуйся, любовию яко соузом ближних связующая,

Радуйся, сердечною теплотою Своею всех верных согревающая.

Радуйся, словеса Божии в души их влагающая,

Радуйся, единомысленных с Богом в Царство вводящая.

Радуйся Преблагословенная Богородице, Милосердная наша заступнице.

Кондак 13

О, Всепетая Госпоже, Мати наша Милосердная, приими убогое моление наше. Милостиво призри утробою щедрот Твоих на рабов Твоих. От всяких бед и напастей, от враг видимых и наипаче невидимых соблюди нас, поющих Богу: Аллилуиа. (Трижды)

Молитва.

Пресвятая и Всемилосердная Богородице, припадая пред чудотворною иконою Твоею, молим Тя от всея души и помышления, отжени от нас зело далече дух неприязни, злопомнения и теплохладности, научи и утверди ум, волю и чувства во еже любити Бога и ближнего от всего сердца, не точию словом, но всею жизнию нашею. Помози избавитися от всяких соуз неправды, от греховных рукописаний наших, очистити глубину сердца и уверити дух наш с Духом Господним. Да обновит и утвердит Бог Завет Свой с нами и вселится в нас навечно, возсиявая радугу добродетелей и благодати в душах наших, да в радости и веселии сердца послужим Пресвятей Троице Отцу и Сыну и Святому Духу во веки веков. Аминь.

От братии во Христе Бахчисарайского мужского монастыря святого великомученика Феодора Стратилата.